यी आठै जना पछिल्लो मधेश आन्दोलनमा कहीं कतै देखिएका अनुहार थिएनन्। बरु, उनीहरू सञ्चार उद्यमी सिंघानिया र नेपाली कांग्रेसको बालाबाखर गाउँ विकास समितिका पूर्व अध्यक्ष राजेन्द्र यादवको हत्यामा संलग्नताको अभियोगमा पक्राउ परेका व्यक्ति हुन्। संघीय गठबन्धन, धनुषाको यस्तो निर्णयमा तराई मधेश लोकतान्त्रिक पार्टीका जिल्ला अध्यक्ष परमेश्वर साह बाहेक आठ वटै मधेशकेन्द्रित दलका जिल्ला अध्यक्षले हस्ताक्षर गरेका छन्।
मुद्दा फिर्ताको सिफारिश गरिएकामा अहिले पुर्पक्षका लागि थुनामा रहेका रामविनोद यादव, चनरदीप यादव, जोगेन्द्र महतो कोइरी, शुभनारायण यादव, रामसुन्दर यादव, नागेश्वर साह, प्रमोदकुमार पूर्वे र कल्याणी देवी यादव छन्। अर्को संयोग के छ भने आठै जना जनकपुर बमकाण्ड गराएको अभियोगमा पक्राउ परेका निलम्बित सांसद् संजय साहका निकटस्थहरू हुन्। साहका सहयोगी समेत रहेका रामविनोद गत साउनमा जिल्ला अदालत धनुषामा उपस्थित भएका थिए।
प्रहरीको 'मोस्ट वान्टेड' सूचीमा रहेका रामविनोद नाटकीय रूपमा अदालतमा उपस्थित हुँदा नै धेरैले आशंका गरेका थिए। राष्ट्रिय मधेश समाजवादी पार्टी (रामसपा) का धनुषा अध्यक्ष देवकृष्ण मण्डलका अनुसार 'मधेश आन्दोलनका सहभागी' भनेर उनीहरूको मुद्दा फिर्ता गराउने निर्णय लिन साहका सहयोगी नवीन यादव सक्रिय थिए। राष्ट्रपति विद्यादेवी भण्डारीको जनकपुर भ्रमणका क्रममा भएको जानकी मन्दिर तोडफोडमा संलग्न रहेको अभियोगमा पक्राउ परेका यादव जिल्ला अदालतबाट धरौटीमा छुटेका थिए।
उम्कने प्रयास
संघीय गठबन्धन, धनुषाले आन्दोलनकारीमाथि लगाइएका मुद्दाबारे भने हालसम्म कुनै निर्णय गरेको छैन। मधेश अधिकार संघर्ष समितिका संयोजक सरोज मिश्र भन्छन्, “आन्दोलनका क्रममा लगाइएका मुद्दाबारे कुनै निर्णय नगर्नु, जघन्य अपराधमा संलग्न अभियुक्तको मुद्दा फिर्ता गर्न सिफारिश गर्नु दुर्भाग्यपूर्ण हो।”
रामविनोद यादव, चनरदीप यादवसहित आठ जना अभियुक्तहरूमाथि लागेको मुद्दा फिर्ता लिन गरिएको गठबन्धन धनुषाको सिफारिश दुर्भाग्यपूर्ण रहेको धनुषाका प्रहरी उपरीक्षक लालमणि आचार्य बताउँछन्। आचार्य भन्छन्, “आपराधिक मुद्दामा राजनीतिक रूपले केरकार हुनु भएन।”
ईश्वरचन्द्र झा, जनकपुर