भाइरस न हुन् पैताला
जहाँ पनि छिर्छन्
पैताला
टाउकोभित्र छिर्छन्
आँखाभित्र छिर्छन्
मुखभित्र छिर्छन्
भाइरस न हुन् पैताला
मुटु, कलेजो, फोक्सो
जहाँ पनि छिर्छन् ।
**
पैताला जहाँ छिर्छन्
म भएर होइन
तिमी भएर छिर्छन्
र त यहाँ
दवित दवित छ प्रेम
दवित दवित छ विद्रोह
दवित दवित छ आवाज ।
**
मुटुभित्रको दवित प्रेम
उम्रिन उम्रिन खोज्छ
तिम्रा पैताला
प्रेमका बीउहरूलाई
मचमची मिच्छन्
थचथची थिच्छन्
र त
मुटुभित्र दवित दवित छ प्रेम ।
**
यो लालपुर्जाको दुनियाँमा
प्रेम जति निर्धो को छ ?
**
मुटुभित्रको दवित आवाज
फुट्न फुट्न खोज्छ
तिम्रा पैताला
हृदयका आवाजहरूलाई
मचमची थिच्छन्
थचथची मिच्छन्
र त
मुटुभित्र दवित दवित छ आवाज ।
**
यो लालपुर्जाको दुनियाँमा
आवाज जति निमुखा को छ ?
विद्रोह जति निम्छरो को छ ?
**
यहाँदेखि
त्यहाँसम्म
दवित दवित छ सपना
एकदिन अचानक
युगौंदेखि पैतालामुनि थिचिएको मुटु
छियाछिया भएर फुट्यो
त्यही छियाछिया भएर फुटेको मुटु न थियो
आगोको बीउ ।
**
के तिमीले देखेका छौ
प्रमिथसको मुटुभित्र आगो थियो
प्रमिथसकै मुटुबाट जन्मिएका हुन्
आगोका फूलहरू
जो दुनियाँ बदल्न
सुन्दर हुन्छन् ।
**
र त फेरि
मुटु फुट्नेछ
फेरि जन्मिनेछन्
प्रमिथसहरू ।
**आगी– आगोलाई थारु भाषामा आगी भनिन्छ । पहिलो पटक आगो सृष्टि गर्ने आगोको अर्थमा प्रयुक्त ।*