इतिहासका हजारौं वर्ष कुल्चेर
आइपुगेका छौं हामी फेसबुकको शताब्दीमा
**
थाहा छ सबैलाई
कि कसरी व्यतित छ यो समयमा
देश र मानिसहरुको कथा
**
अचेल
फेसबूकमै हुन्छ
लासको पोस्टमोर्टेम
फेसबूकमै गरिन्छ
सम्बन्धविच्छेदको अन्तिम निर्णय
र फेसबूकबाटै सुनाइन्छ
कुनै विद्रोही पार्टीको नयाँ घोषणापत्र ।
**
फेसबूकमै बस्छ
केटाकेटीहरुको पहिलो प्रेम
र फेसबूकमै मनाइन्छ एकदिन
सम्बन्धको सुहागरात र विवाहको महाभोज ।
**
गर्भाशयबाट नै सुनेर फेसबूकको कथा
फेसबूकमै जन्मन्छन्
पहिलो पटक बच्चाहरु
फेसबूकमै हुर्कन्छन्
फेसबूकको गीत गाएर ।
**
माइक उचालेर
फेसबूकमै गर्छ जनसम्बोधन
यो देशको अनौठो सरकार
र फेसबूकमै निस्कन्छ
सरकार विरुद्ध
प्रतिपक्षको कालो जुलूस ।
**
सपनाहरुको कीर्तिमान बोकेर
फेसबूकमै चढ्छन्
पर्वतारोहीहरु सगरमाथा
र नाघेर पहाडहरु
फेसबूककै बाटो भएर आइपुग्छ
धूलैधूलोको यो देशमा
समयको एक समुद्री जहाज ।
**
हजार विज्ञान र तमाम शक्तिहरुभन्दा पर
फेसबूक नै हो
यो समयको सबैभन्दा बलियो अस्त्र
कि फेसबूकमै हुनेवाला छ तेस्रो विश्वयुद्ध
फेसबूकमै फेरिनेवाला छ
यो ब्रह्माण्डको अनुहार र ग्रहहरुको आकार
तोडेर शास्त्रहरुको प्राचीन सत्य
यही फेसबूकमै जन्मिनेवाला छ एक दिन
सपनाहरुको अर्को मोर्डन पृथ्वी ।
**
तर त्यतिन्जेलसम्म पनि
कुनै अग्लो हिमालमुनिको जङ्गलमा
आफ्नै बाल्यकालको गीत गाइरहेको हुनेछ
मेरो गाउँको एउटा बूढो मानिस ।