पदक तालिकामा नेपाल दोस्रो स्थानमा रहने निश्चित प्रायः छ । यसअघि काठमाडौंमा २० वर्षअघि भएको आठौं सागमा ३१ स्वर्ण जित्नु नेपालको सबैभन्दा सफल नतिजा थियो । १३औं संस्करणमा त्यो सफलता पार भइसकेको छ ।
सफलताको पहिलो हकदार खेलाडी नै हुन् । उनीहरूको सफलताले आयोजनामा भएका त्रुटि र कमजोरी छायाँमा परेका छन् । आशा गरिए झैं मार्सल आर्टस्का खेलहरू कराते, तेक्वान्दो र उसुबाट मात्र २७ स्वर्ण भित्रिसकेको छ । यीबाहेक एथलेटिक्स, भारोत्तोलन, पौडी र गल्फमा पनि ऐतिहासिक स्वर्ण पदक मिलेको छ । सागका लागि नयाँ खेल ट्रायथलन र साइक्लिङमा पनि स्वर्ण पदक प्राप्त गर्दै नेपालले ऐतिहासिक प्रदर्शन गरेको छ ।
कीर्तिमान रचेका खेलाडी
करातेमा नेपालले निराशाजनक शुरुआत गरेको थियो । स्वर्णको आशा गरिएकी चञ्चला दनुवारले महिला एकल कातामा रजतबाट पदकको खाता खोलिन् । तर, त्यसलगत्तै मण्डेकाजी श्रेष्ठले पुरुष एकल कातामा नेपाललाई स्वर्ण दिलाए । उनी त्यतिमा नै रोकिएनन्, टीम कातामा पनि स्वर्ण जिते । एकै संस्करणमा करातेबाट दुई स्वर्ण जित्ने उनी पहिलो खेलाडी भए ।
आयशा शाक्य तेक्वान्दो
तेक्वान्दोकी आयशा शाक्यले पनि दोहोरो स्वर्ण जितिन् । यसअघि उनले ढाकामा भएको ११औं सागमा पनि स्वर्ण जितेकी थिइन् । तीन स्वर्ण र दुई रजत जितेकी उनी सागमा सबैभन्दा सफल नेपाली महिला खेलाडी भएकी छिन् ।
निमा घर्तिमगर उसु
निमा घर्तिमगरले दुई वटा सागमा लगातार स्वर्ण जितेर उसुमा अहिलेसम्मको ठूलो सफलता प्राप्त गरिन् । १२औं सागमा लगातार हारका कारण नेपाल स्वर्णका लागि तड्पिरहेको वेला उनले उसुमा सफलता दिलाएकी थिइन् ।
सन्तोषी श्रेष्ठ एथलेटिक्स
साग इतिहासमा नेपालको तर्फबाट सबैभन्दा ठूलो ‘ब्रेक थ्रु’ सन्तोषी श्रेष्ठले गरिन् । उनी एथलेटिक्समा स्वर्ण जित्ने पहिलो महिला खेलाडी भइन् । श्रेष्ठले १० हजार मिटर दौडमा ऐतिहासिक स्वर्ण जितेकी हुन् । उनले हासिल गरेको फिल्मी शैलीको जितले पनि निकै चर्चा पायो ।
गौरिका सिंह पौडी
सञ्जु चौधरी भारोत्तोलन
दशकौं लामो प्रयासमा प्राप्त गर्न नसकेको सफलताहरू १३औं सागमा प्राप्त भएको देखियो । भारोत्तोलनमा सञ्जु चौधरीले पनि त्यस्तै सफलता दिलाइन् । उनी नेपालको तर्फबाट भारोत्तोलनमा स्वर्ण जित्ने पहिलो महिला खेलाडी बनिन् ।
गोपीचन्द पार्की एथलेटिक्सद्ध
एथलेटिक्समा गोपीचन्द पार्कीले पनि कीर्तिमानी स्वर्ण जिते । उनले पाँच हजार मिटर दौडमा स्वर्ण जितेका हुन् । मध्यम दूरीमा स्वर्ण जित्ने उनी पहिलो नेपाली खेलाडी भए । यसअघि राजेन्द्र भण्डारीले १०औं सागमा पाँच हजार मिटरमै स्वर्ण जिते पनि पछि डोपिङमा असफल भएपछि पदक खोसिएको थियो ।