लूट, बासुल्ली, टलकजंग भर्सेज टुल्के जस्ता फिल्म बनाएको कम्पनी ब्ल्याक हर्सले निर्माण गरेको कबड्डी का निर्देशक रामबाबु गुरुङ राम्रो सिनेमा बन्न पैसाले नरोकियोस् र चलचित्र डुब्दा पनि निर्माताको घरखेत नजाओस् भनेर जोखिमको सामूहिक हल खोजेको बताउँछन्। कबड्डी मा निर्देशक रामबाबुसँगै सिनेमाटोग्राफर पुरुषोत्तम प्रधान, लूट का निर्देशक निश्चल बस्नेत, रंगकर्मी राजन खतिवडा, दयाहाङ राई लगायत संलग्न छन्। राजनले फिल्मको स्त्रि्कप्ट दह्रो भएकाले यो 'कन्सेप्ट' सफल हुने आशा व्यक्त गरे।
निकै गैर–व्यावसायिक लाग्ने यो 'कन्सेप्ट' मा एक लाख पारिश्रमिक पाउनेले फिल्म चल्यो भने दुई लाख पाउँछ, तर फिल्म डुब्दा एक पैसा पनि पाउँदैन। यस्तोमा जस्तो पायो त्यस्तै फिल्ममा काम गर्न कोही तयार नहुने राजन बताउँछन्। यो 'कन्सेप्ट' मा बनेको कबड्डी १२ वैशाखबाट प्रदर्शनमा आउँदैछ भने तान्द्रो को छायांकन भइरहेको छ। रामबाबु भन्छन्, “शुरुमा स्वामित्व र पछि फिल्म राम्रो चल्यो भने सबैले राम्रै पारिश्रमिक पाउँछन्।” नेपाल चलचित्र निर्माता संघका अध्यक्ष राजकुमार राईले पनि यसलाई निर्माता बचाउने र राम्रो सिनेमा दिने गजबको उपाय मानेका छन्।