दश वर्षअघि संगीतकर्मी बुबा मनराज नकर्मीको गीतको म्युजिक भिडियोबाट कला क्षेत्रमा आएकी आशिष्माको अभिनय नेवारी फिल्ममा पनि अब्बल देखिएको छ। उनले न्याल्ला ब्याँ, पपु मधुमया झानगा, मु मधुगु जिन्दगी, तारेमाम लगायत नेपाल भाषाका दर्जन फिल्ममा अभिनय गरिसकेकी छन्। दुई दर्जन म्युजिक भिडियो कि नायिका आशिष्मा अर्धकट्टी को अन्तिम छायाङ्कनमा छिन्। “पहिलो फिल्म अन्तराल प्रदर्शन लगत्तै मलाई कामको खाँचो भएन”, आशिष्मा भन्छिन्।
सात वर्षअघि 'हस्पिटालिटी म्यानेजमेन्ट' को कोर्स गर्न अमेरिका जाँदा उनलाई धेरैले 'अब नेपाल फर्कन्न' भन्थे। तर, पढाइपछि पाएको होटलको जागीर छोडेर आफ्नो रुचिको काम गर्न नेपाल आइन्। लगातार ६ वटा फिल्ममा काम गरे पनि सबैमा लगभग एकै किसिमको अभिनय गर्नुपर्दा आफ्नो क्षमता देखाउन नपाएको उनलाई लागेको छ। हिन्दी फिल्म डर्टी पिक्चर, फेशन, हिरोइन जस्ता नारी प्रधान ग्ल्यामरसमा अभिनय गर्ने उनको चाहना छ। आशिष्मा भन्छिन्, “चल्तीको भन्दा फरक तर दमदार भूमिकाको प्रतीक्षामा छु।”
साथीभाइबाट 'मृगनयनी' को उपमा पाएकी उनलाई अर्धकट्टी फिल्ममा काम गर्दाको दौरान 'कोक फिगर' भन्न थालिएको छ। कारण, निर्देशक सुव्रत आचार्यले 'कोक फिगर' सुन्दरी खोज्ने क्रममा आशिष्मालाई फेला पारेका थिए। 'कोक फिगर' भनिंदा आशिष्मालाई खुशी नै लाग्छ, तर कतिले 'जम्बो कोक' भनेर टेन्सन दिन्छन्। कोरियन फिल्म मन पराउने उनी कोरियन र स्पेनिस भाषा समेत बोल्छिन्। फिल्म क्षेत्रमै करिअर देखेकी उनलाई समाजसेवामा पनि रुचि छ। भन्छिन्, “भोलि कसैले देखेको छैन, तर म नेपालमै केही गर्न चाहन्छु।”
शब्द/तस्वीरः अनुशील श्रेष्ठ