अछामलाई फागुनभित्रै ‘छाउगोठ मुक्त जिल्ला’ बनाउने तपाईंहरुको अभियान कसरी चलिरहेको छ ?
अहिले अछामका १० वटै स्थानीय तहका जनप्रतिनिधि मार्फत टोलटोलका छाउगोठ भत्काउने अभियान चलिरहेको छ । १५ फागुनभित्र सबै छाउगोठ भत्काइसकेर फेरि अनुगमन गरेपछि स्थानीय तहहरूलाई छाउगोठमुक्त घोषणा गरिनेछ । अहिलेसम्म कमलबजार नगरपालिका र केही वडाहरू छाउगोठ मुक्त भइसकेका छन् ।
५/६ वर्षअघि पनि केही गाविसलाई अभियानै अन्तर्गत ‘छाउगोठ मुक्त’ गरिएको थियो तर, सफल भएन नि ?
त्यो वेला अधिकारकर्मीहरूको पहलमा अभियान चलाइएको थियो । छाउगोठ नभत्काउनेलाई कारबाही गर्ने कानून थिएन, प्रहरीसँग पनि केही अधिकार थिएन । अहिले सबै काम कानून अनुसार भइरहेको छ त्यसैले अहिले भत्किएका छाउगोठ फेरि बन्दैनन् ।
**जनचेतना अभियान नचलाई छाउपडी विरुद्ध राज्य कठोर भएको हो ? **
छाउपडी प्रथा विरुद्धका जनचेतनामूलक अभियान वर्षौंदेखि चल्दै आएका हुन् तर प्रभावकारी नभएपछि कानूनमै दण्ड सजाय राख्नु परेको हो । यस्तो कुप्रथा हटाउन जनचेतनाले मात्र नपुगेपछि यो अभियान थालिएको हो । समुदायलाई साथमा लिएर राज्य कठोर भएको भन्नुपर्ला ।
छाउगोठ भत्काउँदा आएका अवरोधलाई कसरी पार लगाउनुहुन्छ ?
यस्ता परिवर्तनहरूमा सबैले साथ नदेलान् तर समुदायस्तरबाट विरोध नभएकै कारण हामी सफल भइरहेका छौं । यदि कसैले रोक्न खोज्छ भने उसले कानून अनुसारको सजाय भोग्नुपर्छ ।
**छाउगोठ भत्किएपछि स्थानीयको प्रतिक्रिया कस्तो छ **?
पहिले छाउगोठमा बस्ने मात्र होइन, परिवारका सदस्यहरूले पनि पहिले नै गर्नुपर्ने काम भनेका छन् । ढिलोचाँडो सबैले भन्नुपर्ने पनि यही हो । देशकै लज्जाको विषय छाउगोठ अब रहँदैन । अहिले वडास्तरसम्म निगरानी समूह गठन भएका छन् । केही वर्ष निरन्तर अनुगमन हुनुपर्छ ।
१० वर्ष अघिको हिमालबाट
माओवादी र अन्य दलबीच १०/१२ वटा मूलभूत बुँदामा रहेको असहमतिका कारण विस्तृत संविधान बन्न असम्भव ठान्दै केही विश्लेषकहरू ‘संक्षिप्त लोकतान्त्रिक संविधान’ को वकालत गर्न थालेका थिए । तर, संविधानसभाको डेढवर्षे कार्यकालमा दलहरूबीच वैचारिक र राजनीतिक दूरीका कारण राज्य पुनर्संरचनाको मुद्दामा मतभिन्नता कायम थियो । पूर्ण लोकतन्त्रीकरण नभइसकेको माओवादी संविधानसभाको सबैभन्दा ठूलो शक्ति भएकाले उसको स्वीकृति विना निर्धारित समय १४ जेठ २०६७ मा संविधान जारी गर्न चाहिने दुई तिहाइ बहुमत पुग्दैनथ्यो ।
शुरुमै राज्यव्यवस्थाको स्वरुप तथा निर्देशक सिद्धान्तमा सहमति भएर आधार बनेको भए संविधान लेखनले मार्गदर्शन पाउँथ्यो, तर त्यस्तो भइरहेको थिएन । अन्ततः दुई वर्षभित्र संविधान दिने म्यान्डेटसहित निर्वाचित पहिलो संविधानसभा चार वर्षसम्म म्याद लम्ब्याइँदा पनि दलहरूबीच संघीयताबारे सहमति जुट्न नसक्दा संविधान जारी नगरी १४ जेठ २०६९ मा विघटन भयो ।