तमु ल्होछार मनाउन २५ पुसमा अष्ट्रेलियाको सिड्नीमा देखिएको जमघट हेर्दा स्वदेशमै भएको अनुभूति हुन्थ्यो। जातीय पहिरनमा सजिएका गुरुङ समुदायको सांस्कृतिक झाँकीले पूरै मराना अडिटोरियममा नेपालीपन झल्किएको थियो। अष्ट्रेलिया र त्यसमा पनि सिड्नीमा रहेका नेपालीहरु प्रत्येकजसो पर्व एकैठाउँमा भेला भएर, शुभकामना आदानप्रदान गरेर मनाउँछन्। त्यसो त पर्वमा मात्रै होइन, परदेशमा नेपाल चिनाउने उद्देश्यका लागि पनि विभिन्न कार्यक्रम भइरहेकै हुन्छन्।

अष्ट्रेलियामा नेपालीको संख्या करीब ७० हजार पुगेको छ र त्यसमध्येको आधा जति त सिड्नीमै रहेको सरकारी आँकडा छ। बढ्दो आगमनसँगै नेपाली लक्षित व्यापारिक गतिविधि समेत तीव्र भएका छन्। नेपाली पसल, रेस्टुराँहरु खुल्ने क्रम पनि बढेको छ। मज्जाले चलेका पनि छन्। प्रत्येक पसल र रेस्टुरेन्टमा पुग्दा नेपाली परिवेशको स्वाद र आत्मीयता पाइन्छ।