विगत १८ वर्षदेखि क्रिकेटको प्रशिक्षक छु भने १२ वर्षयता राष्ट्रिय टीमको सहायक प्रशिक्षक । लामो समयको योगदान र क्रिकेटमा मेरो लगावको मूल्याङ्कन गरेर पुरस्कृत गरेको भन्ने लागेको छ । मूल्याङ्कनका लागि परिषद्, जुरी टीम र सदस्यसचिवप्रति आभारी छु ।
तपाईंको करिअरको सबैभन्दा ठूलो उपलब्धि के हो जस्तो लाग्छ ?
अन्डर–१९ टीम सन् २०१२ मा वल्र्डकप खेल्नु मेरो प्रशिक्षणको महत्वपूर्ण उपलब्धि हो भन्ने लाग्छ । त्यस्तै टी–२० मा सन् २०१४ को वल्र्डकपका लागि छनोट चरण खेल्न पाउनु अर्को उपलब्धि हो । तर हामी त्योभन्दा ठूलो उपलब्धिको सँघारमा छौं । अहिले बन्द प्रशिक्षणमा रहेको टीमबाट धेरै आशावादी छु ।
नेपाली क्रिकेटले प्रगति गर्नेमा कत्तिको आशावादी हुनुहुन्छ ?
आशावादी होइन विश्वस्त छु । टी–२० मा वल्र्डकप र ५० ओभरमा सुपर सिक्समा पुग्ने तत्कालको लक्ष्य हो, जुन टाढा छैन । सुपर सिक्स पुगेपछि आईसीसीबाटै सेवा–सुविधा पनि पाइन्छ ।
नेपाली टीमको मुख्य कमजोरी के हो ?
ब्याटिङ हो । तर, त्यो पनि सुधारोन्मुख छ । भौतिक पूर्वाधार अहिलेको सबैभन्दा ठूलो चुनौती हो ।
क्रिकेटको थप विकासका लागि के गर्नुपर्ला ?
नेपाल क्रिकेट संघले क्रिकेट लिगका लागि आजैदेखि पहल थाल्नुपर्दछ । लिग नभई खेलाडीहरूलाई खेलमै इङ्गेज गर्न गाह्रो हुन्छ । पछिल्लो समयमा पाएको सफलताको एउटा महत्वपूर्ण कारण ६–६ महीनामा प्रतियोगिता भइरहनु पनि हो । अहिलेको राष्ट्रिय टीमको विकल्पमा आउन सक्ने युवा खेलाडी धेरै छैनन् । विकल्पमा ९० प्रतिशत खेलाडी हुनुपर्दछ ।