राष्ट्र ब्याङ्कले प्रष्ट खाका दिन नसक्दा विकास ब्याङ्कहरू आफ्नै भूमिकामा अलमलिएको देखियो । यसमा वर्गीकरणले कस्तो असर पारेको छ ?
कृष्णराज लामिछानेः विकास ब्याङ्कहरूले करीब ७०० शाखा मार्फत ६० जिल्लामा रु.१६२ अर्बभन्दा बढी निक्षेप परिचालन गरेका छन् । विकास ब्याङ्कहरू वाणिज्य ब्याङ्कसामु छायाँमा परे जस्तो देखिए पनि जिल्लामा अगाडि छन् । ‘क’, ‘ख’, ‘ग’ र ‘घ’ मा वर्गीकरण गर्नु गलत हो ।
हामी आफैं अलमलिएका होइनौं, ब्याङ्क तथा वित्तीय संस्था सम्बन्धी ऐनका कारण समस्या आएको हो । वाणिज्य ब्याङ्कले जस्तै हामीले पनि निक्षेप लिएर कर्जा परिचालन गरेका छौं ।
वर्षा श्रेष्ठः वर्गीकरण अनुसार ‘क’ वर्ग सुरक्षित ‘ख’ र ‘ग’ कमजोर भन्ने बुझइ नै गलत हो । ब्याङ्कले क्षमता अनुसार काम गर्न पाउनुपर्छ । वर्गकै कारण आमविश्वास जित्न गाह्रो परेको छ । नत्र हामीले राम्रै काम गरेका छौं ।
जशोदा सैंजुः ऐन अनुसार काम गरिरहेका छौं । वाणिज्य र विकासमा तोकिएका काम बाहेक अन्य ब्याङ्किङमा खासै फरक छैन । ‘ग’ वर्गमा पर्नासाथ कमजोर भन्ने आमबुझइ गलत छ ।
अशोक शेरचनः देशभरि उपस्थितिका कारण पहिचानको समस्या अबका दिनमा रहँदैन । सरकारी काम गर्न नपाए पनि भोलिका दिनमा निजी क्षेत्रलाई समेट्दै विकास ब्याङ्क खरो प्रतिस्पर्धामा उत्रिने छन् । मुलुकको अर्थतन्त्रमा विकास ब्याङ्कको योगदान भएकोले राष्ट्र ब्याङ्कको संरक्षण आवश्यक छ ।
कृष्णराज पराजुलीः मुख्य कुरा प्रतिस्पर्धा हो । कस्तो पोर्टफोलियो छ, व्यवस्थापन टीम, बोर्ड, सबैको क्षमता र पूँजीबाट संस्था अघि बढ्ने हो । सानो पूँजीबाट राम्रो गर्ने र ठूलोबाट नराम्रो गर्ने पनि छन् । अन्तर्राष्ट्रिय मुद्रा कोष (आईएमएफ), राष्ट्र ब्याङ्क सबैले संस्था धेरै भएकाले घटाउनुप¥यो भनेका छन् । पूँजी बढाउनुपर्ने व्यवस्था गरेपछि मर्जरमा गएर संस्था घट्छन् भन्ने अवधारणा अघि सारिएको छ ।
राजाराम खड्काः राष्ट्रियदेखि एकजिल्ले विकास ब्याङ्कले वाणिज्य ब्याङ्कको पहुँच नपुगेका सर्वसाधारणलाई ब्याङ्किङ गतिविधिमा समेटेका छन् । वर्गीकरण मुख्य समस्या हो । केही वर्षअघिको तरलता अभाव ‘ख’ र ‘ग’ वर्गमा बढी देखिनुको कारण सर्वसाधारणको कम विश्वास भएर हो । विकास ब्याङ्क र फाइनान्स कम्पनीलाई बढी रेगुलेट गर्न खोज्दा विकास ब्याङ्क छायाँमा परेका हुन् ।
कमल गौतमः वर्गीकरण गर्नु नीतिगत कमजोरी हो । पूँजी र कारोबारमा वाणिज्य ब्याङ्कसँग कमजोर देखिए पनि विकास ब्याङ्कको सञ्जाल गाउँसम्म विस्तार भएको छ । राष्ट्र ब्याङ्कले वाणिज्य ब्याङ्कलाई काँध थापेर विकास ब्याङ्क र फाइनान्सलाई छोडिदिन्छ भन्ने आमबुझइ छ । देशको अवस्था सुधार भएमा बिजनेस हामीतिर आउने निश्चित छ । ब्याङ्कर भनेका पाइलट जस्तै हुन्, मौसम अनुकूल हुँदा प्लेन उडाउने नभए चूपचाप बस्ने । कानून र सर्कुलरका रूपमा हेर्दा राष्ट्र ब्याङ्क पूर्वाग्रही नदेखिए पनि वाणिज्य ब्याङ्क र विकास ब्याङ्कबीच गरिने व्यवहार फरक छ ।
अम्बिका श्रेष्ठः आम मानिसमा वित्तीय पहुँच पुर्याउन विकास ब्याङ्कको भूमिका महŒवपूर्ण छ । रेगुलेटरबाट विकास ब्याङ्कमाथि भेदभाव हुँदा हाम्रो पहिचान कम भएको हो । वर्गीकरण हटाएर पूँजी क्षमताको आधारमा काम गर्न दिनुपर्छ ।
कृष्णराज लामिछानेः राष्ट्र ब्याङ्कले हामीलाई वाणिज्य ब्याङ्क सरह नियमन गर्ने हो । कतिपय सवालमा वाणिज्य ब्याङ्कप्रति केही नरम व्यवहार गरेको हुन सक्छ । विकास ब्याङ्कमा संस्थागत सुशासनको समस्या बढी देखिए जस्तो लागे पनि वाणिज्य ब्याङ्कमा पनि यो समस्या छ । केही विकास ब्याङ्कले पोर्टफोलियो व्यवस्थापन गर्न नजानेर पनि समस्या भएको हो । तर, मुख्य समस्या चाहिं राष्ट्र ब्याङ्कले पूँजी बढाउन निर्देशन दिएपछि आएको हो । प्रोभिजिनिङमा रकम गएकाले कतिपय विकास ब्याङ्क अहिले घाटामा भए पनि ऋण फिर्ता भएपछि नाफामा जान्छन् । सुशासन कायम गराउने राष्ट्र ब्याङ्कको भनाइमा हाम्रो समर्थन छ । तर, आगामी असारभित्र पूँजी बढाउन निर्देशन जारी भइसके पनि कतिपय ब्याङ्कले तोकिएको पूँजी पुर्याउन सक्दैनन् । तीनजिल्ले, एकजिल्लेले दुर्गम ठाउँमा शाखा खोलेकालाई केही सुविधा नदिने र वाणिज्य ब्याङ्कलाई सुविधा दिने विभेदकारी नीति हटाउनुपर्छ ।
वर्षा श्रेष्ठः संस्था व्यावसायिक नहुँदा जुनसुकै ठाउँमा समस्या आउँछ । राष्ट्र ब्याङ्कले पनि एउटा संस्थालाई हेरेर नीति ल्याउनुहुँदैन । एउटा विकास ब्याङ्क खराब हुँदैमा सबै खराब हुँदैनन् । राष्ट्र ब्याङ्कको नियमन स्वागतयोग्य छ । अलिअलि समस्या सबैतिर भएकाले वाणिज्य ब्याङ्कहरू पनि मर्जरका लागि पार्टनर खोज्दैछन् । राष्ट्र ब्याङ्कले हाम्रा कतिपय माग सुनुवाई गरेको छ । जस्तो हाम्रो नेतृत्वमा जलविद्युत्मा वाणिज्य ब्याङ्कले पनि लगानी गरेका छन् । एलसी खोल्न दिनुप¥यो भन्दा राष्ट्र ब्याङ्क सकारात्मक भएकै छ । राम्रा ग्राहक वाणिज्य ब्याङ्कमा मात्र होइन, हामीकहाँ पनि आइरहेका छन् ।
जशोदा सैंजुः संस्थागत सुशासन आफैंले कायम राख्ने कुरा हो, अरूले निर्देशित गर्ने होइन । लगानीकर्तालाई पूँजी बढाउनुपर्ने बाध्यताका कारण पनि विकास ब्याङ्कमा संस्थागत सुशासनको अभाव भएको हो । व्यवस्थापनमा बस्नेले प्रमोटरलाई गलत काममा रोक्न नसक्दा पनि अप्ठ्यारो परेको हो । ब्याङ्क प्रमोटरको होइन निक्षेपकर्ताको रकममा चल्छ भन्ने कुरा बुझउन नसक्दा अप्ठ्यारो परेको छ ।
कतिपय विकास ब्याङ्कले तोकिएको पूँजी समेत पुर्याउन नसक्ने अवस्था छ । यस्तो अवस्थामा मर्जर वाणिज्य ब्याङ्कसँग कि विकास ब्याङ्कसँगै ?
अशोक शेरचनः सबैको चाहना वाणिज्य ब्याङ्क बन्ने हो । हामीले समृद्धि विकास ब्याङ्क र वैभव फाइनान्ससँग मर्ज गरेपछि पूँजीमा योगदान पुगे पनि अन्य बिजनेसमा सहयोग पुगेन । वाणिज्य ब्याङ्क हुनासाथ अहिलेको शेयर मूल्य दोब्बर हुने सम्भावना हुन्छ । वाणिज्य ब्याङ्कलाई हेर्ने तरिका फरक छ । जहाँ सर्वसाधारणले लगानीमा सुरक्षा अनुभूति गर्छन् ।
कृष्णराज पराजुलीः कानूनले वाणिज्य ब्याङ्कलाई मात्र ब्याङ्कका रूपमा तोक्दा हामीले गर्न सक्ने सरकारी काम पनि पाएका छैनौं । हाम्रो ब्याङ्किङ विस्तार भएको एक दशक मात्र भयो । जबकि ब्याङ्किङ प्रणालीले पूर्ण आकार लिन २५ वर्षको चक्र पार गर्नुपर्छ । संस्थागत सुशासन सुधार हुँदैछ, संस्थाको संख्या कम हुँदैछ, जनशक्तिको क्षमता बढ्दैछ, व्यवस्थापनले ब्याङ्किङ बुझिरहेको छ, प्रमोटरले पनि धेरै कुरा बुझदैछन् । अबको पाँच वर्षमै ब्याङ्किङ क्षेत्रमा व्यापक सुधार आउनेछ । संस्थागत सुशासनको समस्या वाणिज्य ब्याङ्कमा पनि नभएको होइन । मर्जर यही संक्रमणको उपज हो । सानो पूँजीमा न संस्थाको विस्तार हुन्छ, न लगानीकर्ता सन्तुष्ट हुन्छन् । त्यसैले ठूलो बन्न मर्जर आवश्यक पर्छ ।
राजाराम खड्काः भोलिका दिनमा राम्रो होस् भनेर मर्ज गर्ने हो । झ्ट्ट हेर्दा लगानीकर्ताले बढी प्रतिफल पाउन् भन्ने हो । निक्षेपकर्ता मर्ज चाहन्छन् । अहिले वाणिज्य ब्याङ्क हुनकै लागि विकास ब्याङ्कहरू मर्जरतिर उत्सुक भए जस्तो लाग्छ ।
कमल गौतमः मर्जरले पूँजी वृद्धि, बिजनेस गर्न सहज हुने र संस्था पनि बलियो हुन्छ भनिन्छ । तर, अहिले विकास ब्याङ्कको पूँजी बढाउनुपर्ने जरूरी छैन । किनभने हामीले पूँजीलाई ‘जस्टिफाइ’ गर्ने व्यापार गर्न सकेका छैनौं । पूँजी बढाउन मर्ज भन्ने हो भने फाइनान्स कम्पनीसँग गरे पनि हुन्छ । तर, विकास ब्याङ्क हुनुको तत्कालीन अवस्थाको पीडाबाट पार पाउने उपाय वाणिज्य ब्याङ्कमा जानु हो । लगानीकर्तालाई नाफा दिन नसक्नु जत्तिको पीडा केही हुँदैन । तर, कमर्सियल ब्याङ्कसँग मर्जमा जाँदा ठूलो मूल्य चुकाउनुपर्छ, जुन मर्जर नभई एक्विजिसन जस्तो हुन्छ ।
अम्बिका श्रेष्ठः मर्जरको उद्देश्य पूँजी बढाउन वा मानव संसाधन विकास गर्न भन्ने स्पष्ट हुनुपर्छ । पूँजी वृद्धि बाध्यकारी नभएर क्षमता वृद्धिबाट हुनुपर्छ । पछिल्लो समय स्कूलिङ वा तालीमको कमीले पनि संस्थागत सुशासन कायम हुन नसकेको हो ।
कृष्णराज लामिछानेः वाणिज्य वा विकास ब्याङ्कसँग मर्जर गरिहाल्न सजिलो छैन । असारसम्ममा पूँजी बढाउनुपर्ने घोषणा भइसकेकाले चैत वैशाखपछि पूँजी पु¥याउन नसक्ने संस्थाहरू मर्जरमा जानुको विकल्प हुँदैन । अहिले ३० वटा विकास ब्याङ्कको पूँजी पुगेको छ । तर एसोसिएसनले राष्ट्र ब्याङ्कको व्यवस्थालाई परिमार्जनका लागि समय बढाउन पहल गर्दैछ । एउटा संस्थाले पूँजीको १०–२० प्रतिशतसम्म तत्काल थप्न सके पनि एकैपटक करोडौं थप्न सक्दैन ।
नयाँ नीति ल्याउँदा राष्ट्र ब्याङ्कले सरोकारवालासँग छलफल गर्दैन ?
कृष्णराज लामिछानेः गभर्नर छलफलका लागि सकारात्मक हुनुहुन्छ । भर्खरै हामीले राखेको माग नेपाली रुपैयाँको एलसी–प्रतीतपत्र खोल्न र स्थानीय रेमिट्यान्स कारोबार लगायतका कारोबारमा गभर्नर सहमत हुनुभएको छ । पहिलेभन्दा केन्द्रीय ब्याङ्क बढी अन्तक्र्रियात्मक देखिएको छ । यसो हुँदा नीतिगत कुरामा हामीलाई पनि अपनत्व महसूस हुन्छ ।
खुल्ला बजार अर्थतन्त्र भन्ने तर राष्ट्र ब्याङ्कले त्यसको खिलाफमा स्प्रेड, क्षेत्रगत ऋण तोक्ने गर्छ । अर्कोतिर तपाईंहरू पनि कतिपय सवालमा राज्यको सुरक्षा खोज्नुहुन्छ, यो कसरी मिल्छ ?
कृष्णराज लामिछानेः ब्याङ्कहरूको कमजोरीका कारण पनि राष्ट्र ब्याङ्कले बढी रेगुलेसन गर्नु परेको हो । कतिपय ब्याङ्कको स्प्रेड १० प्रतिशत बढी छ, अनि राष्ट्र ब्याङ्क कसरी चूप लाग्छ ? विकास ब्याङ्कको काम र आय पनि सीमित भएकोले स्प्रेड फरक गर्न अनुरोध गरेका छौं । उदार अर्थतन्त्रमा स्प्रेड तोक्नु राम्रो होइन । बरु क्षेत्रगत लगानी तोक्नु कठिन छ । कृषिमा व्यवसायीकरण र जलविद्युत्मा लगानीको वातावरण नबनेसम्म एक दुई लाख लगानी गरेर तोकिएको २० प्रतिशत लगानी पुग्दैन । विकास ब्याङ्कलाई त अहिले विपन्न वर्गकर्जा पु¥याउनै गाह्रो छ । राष्ट्र ब्याङ्कसँग हाम्रो के गुनासो छ भने वर्गीकरण गर्ने नै हो भने कर्जा पनि तोक्नुपर्यो ।
वर्षा श्रेष्ठः ब्याङ्क भनेको पैसा छाप्ने मशीन हो भन्ने भावना थियो पहिला । लगानीकर्ताले नाफा त खोज्छ नै । कृषि र जलविद्युत्मा जसरी पनि लगानी गर्नुपर्ने व्यवस्था छ । संसारभरि एउटा न एउटा क्षेत्रलाई प्राथमिकताप्राप्त क्षेत्र तोकिएकै हुन्छ । जलविद्युत् र कृषिलाई प्राथमिकता दिने राष्ट्र ब्याङ्कको पहल सकारात्मक छ ।
कमल गौतमः हामीलाई कानूनी रूपमा ब्याङ्कको रूपमा स्वीकारिएको छैन । हाम्रो भूमिका स्थापित हुन ऐनमै सुधार गर्नुपर्छ । सर्वसाधारणमा रहेको ‘ख’ र ‘ग’ वर्गप्रतिको धारणा रातारात बदलिंदैन । छिटो पैसा कमाउन खोज्ने प्रवृत्तिले ब्याङ्कर, लगानीकर्ता, बोर्ड, राष्ट्र ब्याङ्क सबैलाई अप्ठ्यारो हुन्छ ।
कृष्णराज पराजुलीः राष्ट्र ब्याङ्कले ‘ख’ र ‘ग’ ले पनि ५ प्रतिशत स्प्रेड राख्नुपर्ने नीति ल्याएमा दुर्घटना निम्त्याउँछ । ‘क’ मा बढी आय हुने तथा स्प्रेड बढी भएकाले तोक्नु ठीकै हो तर ‘ख’ र ‘ग’ मा बढीमा १० प्रतिशत नाफा भइरहेका वेला स्प्रेड तोके विकास ब्याङ्कहरू धरासायी हुन्छन् ।
अशोक शेरचनः कृषि र जलविद्युत्मा लगानीको लागि अनिवार्य सिमा तोक्नुले ती क्षेत्रमा लगानी बढाउँछ । कृषिलाई व्यवसायीकरण गर्न नीति नै ल्याउनुपर्छ । विकास ब्याङ्कलाई बलियो बनाउन व्यवसायका अरू क्षेत्र हेरेर विस्तार गर्नुपर्छ । आन्तरिक खर्च घटाउन सकिनेतर्फ पनि हेर्नुपर्छ । भर्जिन मार्केट खोजेर लो कस्ट फन्ड खोज्नेतिर ध्यान दिनुपर्छ ।
अम्बिकाः राष्ट्र ब्याङ्कले मर्जरमा सबैलाई सहयोग गरेको छ । तर राष्ट्र ब्याङ्कले यो क्षेत्रमा यति लगानी गर भन्ने होइन, पोर्टफोलियो डाइभर्सिफिकेसन ब्याङ्क आफैंले गर्ने हो । एउटा ब्याङ्क तथा वित्तीय संस्थामा केही समस्या देखियो भन्दैमा सबैलाई दबाब दिनु गलत हो । कुनै ब्याङ्कले अनुशासनमा रहेर काम गरिरहेको छ भने किन नाफा रोक्ने । बजारले प्रतिस्पर्धा अनुसारको काम त गरिहाल्छ नि !
अब विकास ब्याङ्कको दिशा कता जान्छ ?
कृष्णराज लामिछानेः पछिल्ला दश वर्षमा ब्याङ्किङ क्षेत्रमा आएको ठूलो उतारचढावबाट राष्ट्र ब्याङ्क, बोर्ड, म्यानेजमेन्ट, ग्राहक सबैले पाठ सिकेका छन् । यसले ब्याङ्किङ क्षेत्रलाई ठूलो सहयोग गर्छ ।
कृष्णराज पराजुलीः सबै कुराको चक्र २५ वर्षमा पूरा हुन्छ, तर नेपालमा ब्याङ्किङ चक्र त्योभन्दा अघि नै पूरा भएकाले अब समस्या नआउला ।
वर्षा श्रेष्ठः समस्या सिर्जना गर्ने मात्र नभई समाधान गर्न सक्ने क्षमता पनि छ । त्यसैले अबका दिन सुखद् हुनेछन् ।
अम्बिकाः हामीकहाँ नीतिगत अस्थिरता छ । छिटो छिटो नीति परिवर्तन नगरिएमा भोलिका दिन निश्चय नै उज्ज्वल हुनेछन् ।