विद्यालय भवनले रयालेवासी दंग
काभ्रे रयालेको माने दोभानमा रहेको भालचन्द्र माविको पक्की भवन रु.९८ लाख २४ हजार लागतमा बनेको छ । भवनको उद्घाटन निर्माणमा सहयोग गरेको संस्था ‘नेपाल हिल्फे वाइलन ग्रेस इभी जर्मनी’ का संस्थापक सचिव मिखाएल रिवेले ३० भदौमा गरेका थिए । विश्व ब्याङ्कको अनुदानमा संचालित सिंचाइ तथा जलस्रोत आयोजनाका परामर्शदाता पदम तामाङ, संयुक्त राष्ट्रसंघको खाद्य तथा कृषि संगठनमा कार्यरत रामशरण थापा, पर्यटनकर्मी केशव श्रेष्ठ र रातो बङ्गला स्कूलमा कार्यरत बालकृष्ण तामाङ लगायतको अगुवाईमा यो भवन निर्माण भएको हो ।
९३ प्रतिशत तामाङ समुदाय बस्ने रयालेमा यो भवन बनेपछि विद्यालयको पठनपाठन केही सहज हुने भए पनि शिक्षकको अभाव रहेको प्रधानाध्यापक शिवराम आचार्यले बताए । अहिले स्कूलमा पाँच स्थायी, दुई काजमा र पाँच जना निजी स्रोतका शिक्षक छन् । भवन निर्माण गर्न दाता जुटाएका पदम तामाङले स्तरीय शिक्षक खोज्ने अभियानमा लाग्ने बताए । अहिले निजी विद्यालयको अवधारणा अनुसार नर्सरी पनि पढाउन थालिएको र शिक्षकहरूलाई रातो बङ्गलामा तालीम दिन शुरू गरिएको उनले जानकारी दिए ।
ऋषिराम कट्टेल, काभ्रे
राजमार्गमा लुटिंदै यात्रु
दशैं नजिकिंदै गर्दा राजमार्ग क्षेत्रमा नशालु औषधि सुँघाएर लुट्ने क्रम बढेको छ । यसको शिकार भारत र तेस्रो मुलुकमा काम गरेर फर्केका मजदूरहरू हुने गरेका छन् ।
३० भदौमा रात्रिबसमा काठमाडौंबाट महेन्द्रनगर हिंडेका कैलाली रामशिखरझला–२ का सीताराम गिरी र कञ्चनपुर दैजी–४ का नारायणसिंह रावल कञ्चनपुरको बसपार्कमा बस पुग्दा बेहोश अवस्थामा थिए । महाकाली अञ्चल अस्पतालमा चार घण्टा उपचार गरेपछि होशमा आएका सीतारामले चितवन रामनगरको सिद्धबाबा होटलमा खाना खाएपछि बेहोश बनेको बताए । मलेशियाबाट फर्केका सीतारामको रु.८५ हजार, १ तोला सुन, १ थान आइप्याड र चार वटा मोबाइल सेट तथा नारायणसिंहको रु.५५ हजार, आधा तोला सुन र एउटा मोबाइल लुटिएको थियो ।
नारायणसिंह होटलमा भातसँग दिइएको दालमा नशालु पदार्थ मिसाइएको हुनसक्ने अनुमान गर्छन् । आफूहरू विदेशबाट आएको थाहा पाएर बेहोश बनाएर लुटिएको उनको भनाइ छ ।
भदौ दोस्रो साता काठमाडौंबाट रात्रिबसमा महेन्द्रनगर गएका मनिराम भण्डारीलाई पनि बेहोश पारेर नै लुटिएको थियो । चितवन, रामनगरको सिद्धबाबा होटलमै खाना खाएपछि बेहोश भएको र रु.८० हजार लुटिएको उनी बताउँछन् । होटलमा खाना खाएपछि बेहोश भएका उनको महेन्द्रनगर पुगेपछि मात्र होश खुलेको थियो ।
२ भदौमा महेन्द्रनगरबाट पोखरा गएको रात्रिबसका तीन जना यात्रु पनि लुटिएका थिए । दाङ कालाकाटेको चन्द्रसूर्य होटलमा खाना खाएपछि बेहोश भएका उनीहरूलाई पोखराको गण्डकी मेडिकल कलेजको सघन कक्षमा तीन दिन उपचार गरिएको थियो । महाकाली–सेती यातायात व्यवसायी समितिका अध्यक्ष बाबुराम शर्मा दशैं आउनै लाग्दा यात्रुहरू लुटिने क्रम बढेकाले यात्रुहरूलाई सचेत गराउन कर्मचारीलाई निर्देशन दिइएको बताउँछन् ।
शर्माका अनुसार, साना लूटपाटका घटनाबारे यात्रुहरूले प्रहरी र यातायात व्यवसायी समितिलाई नभन्ने भएकाले ठूला लूटपाटका घटना मात्र प्रकाशमा आउने गरेका छन् । महेन्द्रनगर वडा प्रहरी कार्यालयका प्रहरी निरीक्षक पुष्कर चन्द उजुरी आए पनि घटनास्थल आफ्नो कार्यक्षेत्र बाहिर हुने भएकाले अनुसन्धान गर्न र अपराधीलाई पक्राउ गर्न गाह्रो परेको बताउँछन् । घटनास्थल रहेको क्षेत्रका प्रहरी कार्यालयलाई पत्र पठाएर घटनाको अनुसन्धान गर्न आग्रह गरिने गरेको उनको भनाइ छ ।
बच्चु विक, महेन्द्रनगर
उमा सिंह हत्याका अभियुक्त पक्राउ
पत्रकार उमा सिंहका हत्याका अभियुक्त धनुषा बाला सघारा—१ का ३५ वर्षीय उमेश यादव ।
तराई एकता परिषद् नामक पार्टीका अध्यक्ष र जनतान्त्रिक मुक्ति मोर्चा ज्वाला सिंह समूहमा आवद्ध यादवले पत्रकार सिंहको हत्या गर्नुको कारण केही दिनमै पत्ता लगाएर सार्वजनिक गरिने प्रहरी उपरीक्षक सुवेदीले बताए । पत्रकार सिंहको हत्यामा संलग्न ललिता सिंह र नेमलाल पासवान धनुषा जिल्ला अदालतबाट जन्म कैदको सजाय पाएर जलेश्वर कारागारमा सजाय भोगिरहेका छन् ।
यादव पक्राउ गरेपछि धनुषा प्रहरीले सबैतिरबाट स्याबासी र बधाई पाएको छ । नेपाल पत्रकार महासंघ धनुषा शाखाका अध्यक्ष रामआशिष यादव महिला पत्रकारको हत्यारा पक्राउ पर्ने आशा मारिसकेको वेला मुख्य अभियुक्त पक्राउ पर्नुले प्रहरी र न्यायप्रणालीमाथि विश्वास बढाएको बताउँछन् । सिंहका अभियुक्तलाई सजाय दिलाउन निःशुल्क मुद्दा लडेकी अधिवक्ता रेखा झा हत्या गरेको स्वीकारेका अभियुक्तलाई पक्राउ गर्नु प्रहरीको ठूलो सफलता भएको मान्छिन् । अदालतबाट मुद्दा फिर्ता नलिए ज्यान मार्ने धम्की अभियुक्त यादवबाट पाएकाले मृतक सिंहकी आमा सुशीला देवी भारतमा आफन्तको घरमा शरण लिएर बसेकी छिन् ।
मनिका झा, जनकपुर
रमझम
