लामो समयदेखिको मेरो अनुभव र क्रियाशीलतालाई मूल्यांकन गरेर विजयी गराउनुभएको हुनुपर्छ । मैले यसलाई सम्पूर्ण व्यवसायीको जित मानेको छु । हाम्रो समूह क्षेत्र, जातजाति र लैङ्गिक हिसाबले समावेशी पनि थियो ।
पराजितहरूलाई कसरी मिलाउनुहुन्छ ?
चुनाव लोकतान्त्रिक विधि हो । त्यसैले, पराजित साथीहरू असन्तुष्ट हुनुहोला भन्ने लाग्दैन । पर्यटन विकास गर्ने उद्देश्यमा सबैको साथ पाउने विश्वासमा छु । त्यसमाथि, व्यवसायीहरूबीच एकता गराउने मेरो मुख्य प्राथमिकता हुनेछ । सरकार र व्यवसायीबीचको सम्बन्ध राम्रो बनाउन पनि मेरो जोड रहनेछ ।
नेपाल आउने पर्यटकको संख्या बढेको वेला पर्यटन क्षेत्रबाट कर घट्नुको कारण के होला ?
मोफसलको बारेमा अहिले म भन्न सक्दिनँ । उपत्यकाको हकमा चाहिं धेरै चर्चा गर्नुपर्ने विषय हो जस्तो लाग्दैन । अनुगमन प्रभावकारी बनाउने हो भने कसैले कर छल्न सक्दैन ।
राष्ट्रिय तथा अन्तर्राष्ट्रिय गैर–सरकारी संस्थाले कानून विपरीत ट्रेकिङ व्यवसाय सञ्चालन गरेकाले कर घटेको होइन र ?
यो मैले पनि सुनेको छु । त्यस्ता व्यवसायी छन् भने उनीहरूलाई कानूनी दायरामा ल्याउन टानले सरकारी निकायसँग सहकार्य गर्नेछ । अनुगमनका लागि छुट्टै संयन्त्र बनाउने योजना पनि छ ।
अस्वस्थ प्रतिस्पर्धाले पर्यटन क्षेत्रलाई धरापमा पारे जस्तो लाग्दैन ?
स्वरोजगारीका लागि आउने, आधारभूत आवश्यकता पूरा भइसकेका र पर्यटनलाई उद्योगकै रुपमा विकसित गर्नुपर्छ भन्ने मान्यता बोक्ने गरी तीन किसिमका व्यवसायी छन् । त्यसैले आन्तरिक समन्वयमा अभाव देखिएको साँचो हो । अस्वस्थ प्रतिस्पर्धाले सबैभन्दा बढी हानि व्यवसायीलाई नै गर्छ ।