रुकुमको नौबस्तामा भदौ तेस्रो साता अपार शाहलाई सर्पले डस्यो । उनलाई नेपालगञ्जको भेरी अञ्चल अस्पताल पुर्याइँदा भेनम नभएको नमीठो जानकारी गराउँदै ३४ किलोमिटर पश्चिमको गुलरिया अस्पतालतिर दौडाउने सुझाव दिइयो । अपारलाई गुलरिया अस्पतालमा पुर्याउँदा नपुर्याउँदै शरीरभरि फैलिएको विषले आफ्नो काम गरिसकेको थियो ।
३० साउनको साँझ् सर्पले टोकेकी रूपन्देहीकी १५ वर्षीया सुमित्रा चौधरीलाई आफन्तहरूले भोलिपल्ट बिहान लुम्बिनी अञ्चल अस्पताल पुर्याए, तर एन्टी स्नेक भेनम छैन भन्दै गेटबाटै फर्काइयो । भरतपुरमा छ भनेपछि सुमित्रालाई त्यतै दौडाए, तर उनलाई अस्पताल पुर्याउन सकिएन ।
यी अखबारमा आएका प्रतिनिधि घटना हुन् । समाचार नबनेका घटना र देख्न नसकिएका कष्टको पहाड निकै अग्लो होला÷छ । यो पक्षमा घोत्लिंदा नागरिकलाई सिंहदरबारमाथि जाइलागूँ जस्तो लाग्न सक्छ । तर, त्यसको पर्खाल निकै अग्लो र बलियो छ । जनता जस्तै सर्प पनि सिंहदरबारभित्र हत्पती छिर्न सक्दैन । सिंहदरबारमा सर्पदंशको समस्या छैन, बरु त्यो आफैं एकफाले बिखवाला सर्प बनेको छ । सिंहदरबार बाहिरको नेपालमा वर्षेनि लगभग पाँच हजार नेपाली सर्पले डसेर मर्छन् । मुलुकका राष्ट्रपति, मन्त्री र नेताहरूलाई आवश्यक पर्दा विदेशमा लगेर महँगो उपचार गराउन सक्नु आफैंमा राम्रो कुरा हो, तर अस्पताल पुगेका सर्वसाधारण औषधि नपाएर मर्नु भनेको राज्यको अपराध हो ।
गर्मी सिजनमा सर्पले टोक्छ । यस्तो वेला अस्पताल छ, एन्टी स्नेक भेनम छ र बचाउने डाक्टर छन् भन्ने मान्यता भत्केको छ । सम्झँदै आक्रोशभाव पैदा हुने कुरा के छ भने, सरकारले एन्टी स्नेक भेनमको जोहो नगरेकै डेढ वर्ष भएछ । डेढ वर्षअघि भारतसँग ३० हजार भायल किनेको रहेछ भने डब्लुएचओले केही महीनाअघि २२ हजार भायल दिएको रहेछ । त्यति भायल देशभरि छरेर थकाइ मारिरहेको रहेछ, स्वास्थ्य मन्त्रालय । बाढी पीडितलाई दिने चिउरा र चाउचाउ जस्तो हो एन्टी स्नेक भेनम ? ठूलाको उपचारमा करोडौं खर्च गर्न सक्ने राज्यले जनतालाई केही लाख खर्चेर सर्पदंशबाट बचाउने जोहो गर्नुपर्दैन ?
यो वर्ष कति भेनम चाहिन्छ, जिल्ला र अञ्चल अस्पतालका डाक्टरहरूलाई सोधे पत्ता लागिहाल्छ । तर, सरकारले निकै मान्छे मरेपछि र सर्पदंश घटेपछि औषधिको जोहो गर्दैछ । चरम ढिलासुस्तीको समस्या त छँदैछ ।
त्यसमाथि, सरकारले आव २०५७/५८ देखि सर्पदंशको निःशुल्क उपचार ‘थालेको’ रहेछ । ‘निःशुल्क’ को हल्ला चलेपछि पहिला बजारमा छ्याप्छ्याप्ती पाइने भेनम औषधि पसलेहरूले बेच्न छाडेछन् । यसरी पैसा भएर पनि उपचार अवस्था आइलाग्यो । औषधि जोहो गर्न नसक्ने सरकारको सस्तो प्रचारबाजीले नकाम ग¥यो । देश चलाउनेहरू सर्पभन्दा बिखालु देखिए । भेनमको आपतकालीन जोहो गरेर सर्पदंशबाट मान्छे बचाउनेहरूको जय होस् ।