सोनी टेलिभिजनमा प्रसारण भएको अमर धरा सिरियलको ५० औं श्रृंखलापछि ‘फूल’ निर्देशक बनेका उनले त्यसपछि साहारा च्यानलबाट प्रसारित माताकी चौकी, मान रहे तेरा पिता, सोनी टेलिभिजनको अग्ले जनम मोहे विटीया ना कीजो निर्देशन गरे । २०० श्रृंखलाको महाभारत उनको पछिल्लो प्रोजेक्ट हो । १५ वर्षको उमेरमा ७ कक्षा पढ्दापढ्दै कामको खोजीमा मुम्बई हान्निएका लोकनाथलाई नेपालमा हुँदासम्म सिनेमा के हो भन्ने समेत थाहा थिएन । “काम खोज्ने क्रममा सिरियल बनाउने कम्पनीको कला निर्देशकको सहयोगी बन्ने मौका पाएँ”, लोकनाथ सम्झन्छन्, “त्यसपछि तारा लगायत विभिन्न सिरियलमा उनको सहयोगी भएर काम गरें ।”
अहिले त उनलाई मुम्बईमा भ्याई नभ्याई छ । अहिले लोकनाथले निर्देशन गरिरहेको महाभारत र पहिले प्रशारण भइसकेको महाभारतको कथा एउटै भए पनि प्रस्तुतीकरण र कलाकार फरक छन् । त्यसकारण पनि यो प्रोजेक्ट बढी चुनौतीपूर्ण भएको बताउँदै लोकनाथ भन्छन्, “तर, मैले दर्शक तानेर देखाएको छु, धेरै राम्रो प्रतिक्रिया आइरहेको छ ।”
भारतकै पनि हजारौं प्रतिभा हराउने मायानगरी मुम्बईमा गुल्मेली ठिटो लोकनाथले बनाएको यो मुकाम निसन्देह चानचुने होइन ।