सीमा आभास

तपाईंले लेखेको किताब

तपाईंको विद्वत्ता, दर्शन र अध्यात्म मै हुँ

मै हुँ यो सभ्यताको धरोहर

तपाईंको सभ्य शैली

मन्त्र जस्ता तपाईंका पवित्र वाणी पनि मै हुँ ।

तपाईंको निन्द्रा र सपना

ध्यान, जप, तप मै हुँ

म नै हुँ तपाईंको नग्नता छोप्ने बस्त्र

तपाईंको अहंको सुरक्षाकवच

तपाईंलाई आराम दिलाउने घर ।

तपाईंभित्र हुर्हुरिने रीसको फिलुङ्गो म हुँ

तपाईंभित्रको भयंकर शैतान पनि म हुँ

इष्र्या र जलनले डामेको तपाईंको मस्तिष्क म हुँ

म नै हुँ तपाईंको मुटुभित्रको ढुकढुक

तपाईंको रगतभित्रको नदी

म नै हुँ तपाईंको प्राण ।

तपाईं जे–जे हो त्यो सबै म हुँ

म जे–जे हुँ तपाईं कुनै पनि हैन

र

म जे–जे हुइनँ त्यो पनि सबै म हुँ ।

तपाईं जहाँ–जहाँ उभिनुहुन्छ

त्यहाँ–त्यहाँ म थेगिदिन्छु तपाईंका पैताला

म जहाँ–जहाँ उभिन खोज्छु

त्यहाँ–त्यहाँ तपाईं भसाइदिनुहुन्छ मैले टेक्ने जमीन ।

तपाईंको सभ्यताको कठपुतली

तपाईंको अध्यात्मको भ्रम

तपाईंको नैतिक धरोहर

यी सारा साराबाट आजित छु म ।

तपाईं नहुँदै पनि फेरेको छु सास मैले

हिंड्न सक्छु म आफ्नै पैतालाले

आफैं पुछ्न सक्छु पसिना आफ्नो

उद्घोष गर्छु

नसामा धुकधुकी ब्यूँताएर

उतार्नेछु अब मेरो खाँट्टी रुप ।

तपाईंको चेतना जगाउने ज्योति पनि मै हुँ

तपाईंको शरीर बँचाउने आत्मा पनि मै हुँ ।

अब भन्नुस् जीवित तपाईं हो या म ?