असोज २०७९ | 17/09/2022

ईश्वर र मान्छे

Share:
  
- रिमा केसी

म आगोमा जलिरहें
तिमी सागर बेच्दै गयौ उधारोमा
पानीले पनि मट्टीतेलले जस्तै भिजायो
र, आगोसित राख्यो सम्बन्ध

म फलाम झैं चुटिएँ
तिमी रमिता हेरी बस्यौ

लेख्दै गयौ म जलेको गजल
गाउँदै गयौ प्रीत मरेको मेरो गीत

ईश्वर बनाई पूजें
तिमी मनमन्दिरबाट निस्कियौ
र, भयो एउटा देवताको अवसान

म ईश्वरको मृत्युमा
लेख्न बसेको छु एउटा शोक गीत

ए सङ्गीतकारहरू,
भरिदेऊ एउटा यस्तो सङ्गीत
कि ईश्वरहरूले फेरून् जुनी र बनून् मान्छे।


comments powered by Disqus

रमझम