संविधानसभा निर्वाचन सकिएको दुई महीना पुग्दा पनि कसको नेतृत्वमा सरकार बनाउने भन्ने निर्णयमा दलहरू पुगिसकेका छैनन्। हिमाल ले गत साता देशका प्रमुख १२ शहरमा गरेको सर्वेक्षणले कांग्रेस नेतृत्वमा सर्वदलीय सरकार हुनुपर्ने देखाएको छ। कुल ३६१ उत्तरदातालाई सोधिएको 'अबको सरकार कसको नेतृत्वमा कस्तो बन्नुपर्ला?' भन्ने प्रश्नमा ५७.६ प्रतिशतले 'नेपाली कांग्रेसको नेतृत्वमा सर्वदलीय सरकार' हुनुपर्ने विचार राखे। २१.३ प्रतिशतले 'कांग्रेसको नेतृत्वमा एमाले मात्र सहभागी रहेको' सरकार बन्नुपर्ने बताए भने ७.८ प्रतिशतले 'एमाले प्रतिपक्षमा रहने गरी कांग्रेसको नेतृत्वमा अरू दल सहभागी रहेको' सरकार बन्नुपर्ने जवाफ दिए। ३ प्रतिशत उत्तरदाताले भने 'एमाले सरकारमा नजाने गरी बाहिरी सहयोगमा कांग्रेस नेतृत्वको सरकारको विकल्प रोजे। १० प्रतिशत उत्तरदाताले 'थाहा छैन' र ०.३ प्रतिशतले 'भन्न चाहन्न' भन्ने जवाफ दिए।
'कांग्रेसको नेतृत्वमा सर्वदलीय सरकार बन्नुपर्ने' विचार राख्नेमध्ये सबैभन्दा धेरै मध्यपश्चिमाञ्चल र सुदूरपश्चिमाञ्चलका ६४ प्रतिशत छन्। त्यसैगरी, मध्यमाञ्चलका ६१.५, पूर्वाञ्चलका ४९.३ र पश्चिमाञ्चलका ४८ प्रतिशतले पनि कांग्रेस नेतृत्वमा सर्वदलीय सरकार बन्नुपर्ने विचार राखे। कांग्रेसको नेतृत्वमा एमाले मात्र सहभागी रहेको सरकार बन्नुपर्ने उत्तर दिनेमा सबैभन्दा धेरै सुदूरपश्चिमाञ्चलका ३६ प्रतिशत छन्। कांग्रेसको नेतृत्वमा एमाले मात्र सहभागी रहेको सरकार बन्नुपर्ने उत्तर दिनेमा स्नातकोत्तर तह अध्ययन गरेका ३८.१, स्नातक तह पढेका २७.५, प्रमाणपत्र तह पढेका २२.२ र एसएलसीसम्म पढेका २०.३ प्रतिशत छन्। शतप्रतिशत मधेशी दलित, ७७.८ प्रतिशत मुस्लिम, ६३.२ प्रतिशत नेवार तथा ६३.८ प्रतिशत पहाडी जनजातिले कांग्रेस नेतृत्वमा सर्वदलीय सरकार बन्नुपर्ने उत्तर दिए।
नयाँ सरकारको नेतृत्वका लागि कांग्रेसका शीर्ष तीन नेतृत्वबीच रस्साकस्सी चलिरहेको छ। 'कांग्रेसका कुन नेताको नेतृत्वमा सरकार बन्नु उपयुक्त होला?' भनेर सोधिएको प्रश्नमा बहुसंख्यक ५६ प्रतिशतले सुशील कोइरालालाई रोजे। १७.२ प्रतिशतले शेरबहादुर देउवा र ९.४ प्रतिशतले रामचन्द्र पौडेलको नेतृत्वमा सरकार बन्नुपर्ने बताए। ११.९ प्रतिशतले थाहा छैन र २.२ प्रतिशतले भन्न चाहन्न भन्ने जवाफ दिए। ३.३ प्रतिशतले 'अन्य' नेताको नेतृत्वमा सरकार बन्नुपर्ने विचार राखे।
कोइरालालाई रोज्नेमध्ये सबैभन्दा धेरै १८–२४ वर्ष समूहका ६५.८ प्रतिशत छन्। देउवालाई प्रधानमन्त्री बनाउनुपर्ने विचार राख्नेमा सबैभन्दा धेरै २५–३९ वर्ष समूहका २०.६ प्रतिशत छन्। स्नातकोत्तर तह वा सोभन्दा माथि पढेका ४२.९ प्रतिशतले कोइराला, २३.८ प्रतिशतले देउवा र १४.३ प्रतिशतले पौडेललाई प्रधानमन्त्री बनाउनुपर्ने उत्तर दिए। शतप्रतिशत मधेशी दलित, दुईतिहाइ मधेशी जनजाति, ६६.७ प्रतिशत मुस्लिम, ६२.५ प्रतिशत पहाडी दलित, ५८.६ प्रतिशत पहाडी जनजाति, ५५.३ प्रतिशत नेवार, ५४.१ प्रतिशत मधेशी र ५२.७ प्रतिशत पहाडीले कोइरालाको नेतृत्वमा सरकार बन्नुपर्ने उत्तर दिए।
तथ्यांकशास्त्री बालकृष्ण खड्काको नेतृत्वमा देशभरका १२ शहरमा हरेक साता गरिने यस सर्वेक्षणका लागि द एशिया फाउण्डेशनको सहयोग रहेको छ।
–सम्पादक