रेस्टुरेन्ट लेन बनेको ललितपुरको झम्सीखेलस्थित 'सिंग–मा फूड कोर्ट' का परिकारले साँच्चिकै सिंगापुरको स्वाद सम्झाउँछन्।

सिंगापुरका चलनचल्तीका रेस्टुरेन्टहरु जस्तै सफा र सादा तरिकाले सजाइएका 'सिंग–मा' का दर्जन बढी टेबलहरु 'लञ्च आवर' पछि पनि व्यस्त नै देखिन्छन्। कोकोनट मिल्क र लेमन ग्रास हालिएको तात्तातो चिकेन तोमयाम गई (रु.३१०) को तिखो वासना र त्यसमा रहेको मसरुम र चिकेनका टुक्राहरुले खानाको मूड बढाउँछ।

चिकेन रेण्ड्याङ र बासमती चामलको भातसँगै पस्किने 'नासी लेम्याक सेट' (रु.४३०) साँच्चिकै स्वादिस्ट छ। साथमा पाइने अण्डा र एंकोवी माछाले यसको स्वाद अरु बढाउँछ। गोरेङ पिसाङ (रु.१४०) यहाँको राम्रो डेजर्ट हुन सक्छ। सुनौला खैरो रंग हुने गरी फ्राइ गरिएको केराको यो परिकारको मजा नै वेग्लै छ।