मण्डला नाटकघरमा अब संसारका उत्कृष्ट फिल्महरु पनि हेर्न पाइनेछ। मण्डलाले व्यावसायिक रुपमा सफल नभए पनि कथा, अभिनय, निर्देशन, कला, प्रविधि र मेकिङका हिसाबले उत्कृष्ट मानिएका फिल्महरु प्रत्येक सोमबार प्रदर्शन गर्ने गरी, 'मण्डे मूभी' नामक श्रृंखला शुरु गरेको छ।
इरानी सिनेमा द सङ अफ स्प्यारो देखाएर २३ भदौदेखि शुरु गरिएको 'मण्डे मूभी' मा सिनेमा प्रदर्शनसँगै यस क्षेत्रसँग सम्बन्धित व्यक्ति, कलाकार र रुचि राख्नेहरुबीच अन्तरक्रिया पनि हुनेछ। नाटकघरका अध्यक्ष रहेका अभिनेता दयाहाङ राईका अनुसार, यस्तो प्रदर्शन र छलफलले नेपाली सिनेमालाई फाइदा पुग्ने देखेर 'मन्डे मूभी' शुरु गरिएको हो। राई भन्छन्, “एक महीनासम्म एउटै देशको बेग्लाबेग्लै फिल्म देखाउने गरी श्रृंखला शुरु गरिएको छ।”
यो श्रृंखलाको संयुक्त आयोजक नेपाल चलचित्र समीक्षक समाज, मण्डला नाटकघर र इन्डिजिनियस फिल्म अर्काइभ हुन्।