२६ वैशाखमा होटल संघ नेपाल (हान) को साधारण सभाबाट सिर्जना राणा अध्यक्षमा निर्वाचित भइन्। होटल व्यवसायको गुणस्तरमा जोड दिंदै नवनिर्वाचित अध्यक्ष राणा भन्छिन्, “होटलको संख्या वृद्घि हुँदैमा सकारात्मक मान्न मिल्दैन।”
योजना त धेरै छन् । तर विशेष योजना भने, होटल व्यवसायमा अहिले रहेका समस्या समाधान गरी पर्यटन क्षेत्रमा योगदान गर्ने हो । साथै, सरकारले घोषणा गरेको ‘नेपाल भ्रमण वर्ष २०२०’ लाई संघको तर्फबाट सघाउन हरसम्भव प्रयास गर्नेछु ।
यस क्षेत्रका समस्या के छन् ?
मुख्यतः सरकारले होटल व्यवसायीको क्षमता भन्दा अत्यधिक कर लगाएको छ । सरकारले विगतमा होटल व्यवसायलाई राष्ट्रिय प्राथमिकता प्राप्त उद्योगको रुपमा मान्यता दिने निर्णय गरेको थियो, तर हालसम्म कार्यान्वयन हुनसकेको छैन । रु.१० खर्बको लगानी र १० लाख भन्दा बढीलाई रोजगारी दिएको क्षेत्रलाई बेवास्ता गरिनु दुःखद हो । यसका साथै, देशका प्रायः क्षेत्रमा विकास पूर्वाधारको अभाव, पर्यटकीय क्षेत्रको विकास र प्रवद्र्धन नगरिनु लगायत समस्या छन् ।
होटल व्यवसायको विस्तारको गति कस्तो छ ?
विस्तार तीव्र गतिमै भइरहेको छ । तर होटल, लज आदिको संख्या बढ्दैमा यस क्षेत्रको विकास भएको भन्न मिल्दैन । गुणस्तर महत्वपूर्ण विषय हो । होटलहरूले पर्यटकको माग अनुसार उत्कृष्ट सेवा–सुविधा दिन सक्नुपर्छ, जुन अझै पनि हुनसकेको छैन ।
यो व्यवसायमा थपिइरहेको लगानीले के संकेत गर्छ ?
होटलमा लगानी बढ्नुको मुख्य कारण यसमा रहेको व्यावसायिक सम्भावना नै हो । व्यवसायीलाई मुनाफा आर्जन र देशको आर्थिक उन्नतिको स्रोत हो, यो ।
पर्यटन क्षेत्रले लाभ लिन कस्तो नीति चाहिन्छ ?
सरकारले देशलाई विदेशी पर्यटकको मुख्य गन्तव्यस्थल बनाउने किसिमको नीति ल्याउन आवश्यक छ । जस्तैः स्थानीय संस्कृति, रहनसहनको प्रवद्र्धन गर्ने, प्राकृतिक स्थल र सम्पदाहरूको प्रचार गर्ने र विशेष गरी हाम्रा स्थानीय परिकारलाई अन्तर्राष्ट्रियस्तरमा चिनाउने । अब सात वटै प्रदेशका मुख्य विशेषता उजागर गरी यसलाई देश बाहिर चिनाउने नीति सहित अघि बढ्नुपर्छ ।