राजवको नयाँ कथासंग्रह
कथाकार राजवको पाँचौं कथा संग्रह ‘कमरेड ड्राइभर’ प्रकाशित भएको छ । राजवका कथामा देश–विदेशका नेपाली समाज र राजनीतिका क्रूरतम यथार्थहरूलाई कलात्मक स्पर्शका साथ सजीव रूपमा उतारिएका हुन्छन् । कथालेखनमा विशेष गद्यशैली, दृष्टिकोण र कथ्य छनोट भएका राजवले पाठकलाई आफ्नै किसिमको संवेदित उचाइमा पुर्याउँछन् । सांग्रिला बुक्सबाट प्रकाशित राजवको ‘कमरेड ड्राइभर’मा समाज र राजनीतिका विसंगतिसँगै सबाल्र्टन जीवनका यथार्थहरू पर्गेलिएका १६ कथा समेटिएका छन् ।
झन् बिच्किए चलचित्रकर्मी
नेपाल चलचित्र विकास बोर्डमा चलचित्रकर्मीकै नेतृत्व हुनुपर्ने लगायतका ९ बुँदे माग राख्दै आन्दोलन गरिरहेका कलाकारहरू सरकारले धर्मेन्द्र मरवैता (पप्पु) लाई बोर्ड अध्यक्षमा नियुक्त गरेपछि झ्नै बिच्किएका छन् ।
मण्डलामा माइलाको, मनोदशा
चिया पसलकी साहुनी र कामदार माइलाबीच हुने दैनिक सहकार्यको प्रभाव केलाइएको नाटक माइला डट कम अनामनगरस्थित मण्डल थिएटरमा जारी छ । माघ ६–२० सम्म मञ्चन हुने यो नाटकमा काम गर्ने क्रममा अधबैंसे साहुनीले गरेको दयामायालाई माइलाले प्रेमको रूपमा बुझन थाल्छ । यसरी जवान माइलाको यौन मनोदशा केलाइएको रोचक नाटकमा राजन खतिवडा र सिर्जना सुब्बाले (हे. तस्वीर) कुशल अभिनय गरेका छन् । यही कारण, दयाहाङ राईद्वारा लिखित÷निर्देशित माइला डट कम को १७औं प्रदर्शनले पनि राम्रै गरी दर्शक पाइरहेको छ ।
गफ मात्रै !
आफ्नो ‘करिअर’को निर्णायक हुनपुगेको चलचित्र थ्री लभर्स र कलिउड एकपछि अर्को डुवानमा परेपछि नायिका प्रियंका कार्कीबाट तातिने आशा गरिएको नेपाली फिल्म बजार सेलाउन थालेको छ । मिस टिन २००५ रहेकी उनी ‘नेपाली फिल्ममा जम्नकै लागि’ श्रीमान्लाई अमेरिकामा छाडेर नेपाल फर्केकी थिइन् । तर, ‘डाइनिङ टेबुल सेक्स’ को रोमाञ्चकारी अनुभव समेत सुनाएर चर्चित भएकी प्रियंकाको अभिनयबाट नेपाली सिने दर्शक सन्तुष्ट भएनन् । अब प्रियंकाले उत्तेजक तस्वीर र त्यस्तै गफको सहारा लिन्छिन् कि अभिनय तिखार्छिन्, उनको ‘करिअर’ त्यसैमा निर्भर देखिन्छ ।
रमझम
